Ambasadori i Kosovës në Bruksel, Agron Bajrami, ka zhvilluar një takim me emisaren speciale të Mbretërisë së Bashkuar për Ballkanin Perëndimor, Karen Pierce. Në këtë takim u diskutua për mënyrat e përshpejtimit të integrimit euro-atlantik të Kosovës, i cili konsiderohet një objektiv strategjik dhe një investim jetësor për stabilitetin dhe prosperitetin në rajon dhe Evropë. Gjithashtu, u trajtua avancimi i dialogut të lehtësuar nga Bashkimi Evropian me Serbinë, si dhe forcimi i pozicionit ndërkombëtar të Kosovës dhe konsolidimi i vendit në familjen evropiane dhe transatlantike. Ambasadori Bajrami theksoi rëndësinë e aleancave të bazuara në vlera të përbashkëta dhe besim në një kohë të pasigurisë gjeopolitike në rritje.