Kreu i Zyrës për Kosovën në qeverinë e Serbisë, Petar Petkoviç, ka reaguar pas pajtimit të Qeverisë së Kosovës me BE-në për disa hapa shtesë në implementimin e Ligjit për të Huajt. Ai theksoi se kjo marrëveshje nuk nënkupton integrimin e institucioneve paralele arsimore dhe shëndetësore serbe në sistemin e Kosovës, as njohjen e pavarësisë së saj. Sipas Petkoviç, krerët e komunave serbe do të përpilojnë lista të të punësuarve në këto institucione, të cilat do të përdoren për të dhënë të drejtën e punës dhe qëndrimit për një periudhë 12-mujore. Ai vlerësoi se përmes këtij dakordimi është evituar mbyllja e institucioneve paralele dhe se serbët në Kosovë do të mund të punojnë lirshëm në institucionet e tyre.