Asociacioni i Komunave të Kosovës ka paralajmëruar një protestë më 1 shtator në sheshin “Skënderbeu” në Prishtinë, duke kundërshtuar ndërhyrjet e nivelit qendror në kompetencat dhe financat e komunave. Drejtori i Asociacionit, Sazan Ibrahimi, ka theksuar se pjesëmarrja e komunave në protestë është vullnetare dhe asnjë komunë nuk mund të detyrohet të marrë pjesë. Ai shprehu besimin se megjithatë do të ketë përfaqësues dhe qytetarë nga komunat, për shkak të dëmit të madh financiar dhe institucional që po u shkaktohet. Ibrahimi përmendi si problematikë kontratën kolektive dhe moszbatimin e një aktgjykimi të Gjykatës Kushtetuese, duke paralajmëruar se nëse gjykatat fillojnë të marrin mjetet financiare nga komunat, humbjet mund të arrijnë mbi 60 milionë euro.