Ish-shefi i Grupit Parlamentar të AAK-së, Besnik Tahiri, ka zbuluar për herë të parë se partia e tij kishte përgatitur një plan për të ndaluar fizikisht procesin e votimit të kandidates për presidente nga Lëvizja Vetëvendosje, nëse ky proces do të vazhdonte pa korum. Tahiri tha se nëse do të kishte shkuar në raundin e tretë të votimit me 60 vota, AAK-ja do ta kishte ndërprerë atë me të gjitha mekanizmat e mundshëm, duke përfshirë edhe ndërhyrjen fizike në sallë. Ai theksoi se askush nuk është mbi ligjin dhe Kushtetutën, duke nënvizuar se zgjedhja e presidentit me 60 vota nuk do të lejohej nga opozita. Këto deklarata u dhanë gjatë një emisioni televiziv, ku Tahiri u shpreh se opozita ishte e gatshme të vepronte edhe në mënyrë më radikale për të penguar këtë proces.