Kryetari i Komunës së Podujevës, Shpejtim Bulliqi, ka njoftuar se nga 1 shtatori komuna do të fillojë ofrimin e mbështetjes edukative për fëmijët në spektrin e autizmit, duke angazhuar staf profesional komunal. Ky hap konsiderohet i rëndësishëm për t’u afruar më shumë me nevojat e fëmijëve dhe familjeve të tyre. Gjatë një takimi me përfaqësuesit e shoqatës “AUTIZMI”, Bulliqi falënderoi përkushtimin e tyre dhe theksoi mbështetjen financiare që Komuna ka dhënë çdo vit. Ai gjithashtu shprehu gatishmërinë për të vazhduar bashkëpunimin, veçanërisht në trajnimet e stafit që do të punojë me këtë kategori fëmijësh.