Deputetja e PDK-së, Blerta Deliu-Kodra, ka kritikuar ashpër amendamentet kushtetuese të propozuara nga presidentja Vjosa Osmani për zgjedhjen e drejtpërdrejtë të presidentit të Kosovës. Ajo i ka cilësuar këto ndryshime si një përpjekje për devijimin e rendit kushtetues dhe ka theksuar se koha e trajtimit të tyre është e papërshtatshme, pasi vendi ndodhet në përmbyllje të afatit kushtetues. Sipas saj, problemi kryesor nuk është kriza kushtetuese, por mungesa e marrëveshjeve politike dhe konsensusit për krijimin e institucioneve të reja, që ka çuar në dështimin e zgjedhjes së presidentit. Deliu-Kodra ka akuzuar shumicën parlamentare se po përdor ndryshimet kushtetuese për interesa personale dhe për të devijuar proceset institucionale, duke theksuar se kjo situatë është e përsëritur dhe e dëmshme për shtetin.