Aleanca për Shqiptarët (ASH) ka reaguar ashpër ndaj deklaratave të VLEN-it lidhur me tragjedinë e Tetovës, duke i cilësuar si hipokrizi politike. ASH thekson se para se VLEN-i të kërkojë përgjegjësi institucionale dhe drejtësi, duhet të japë llogari për rolin e drejtuesve të saj, Izet Mexhitit dhe Bilall Kasamit, të cilët në atë kohë ishin pjesë e qeverisjes dhe kanë përgjegjësi politike për ngjarjen. Sipas ASH-së, tragjedia dhe humbja e 14 jetëve njerëzish nuk duhet të përdoren si mjet për përplasje partiake, ndërsa familjet e viktimave meritojnë të vërtetën dhe drejtësinë e plotë. Reagimi i ASH-së nënvizon se drejtësia nuk mund të kërkohet vetëm për kundërshtarët politikë, duke injoruar rolin e vetë drejtuesve të VLEN-it në atë periudhë, duke akuzuar kështu për hipokrizi dhe manipulim politik.