Eugen Cakolli nga KDI ka kritikuar mbajtjen e takimeve konsultuese për zgjedhjen e Presidentit në zyrën e Kryeministrit, duke theksuar se kjo është një çështje që i takon Kuvendit dhe duhet të zhvillohet mes kryetarëve të partive parlamentare. Ai e ka quajtur “të çuditshme” që takimet për këtë proces të mbahen në ambientet e Qeverisë, pasi zgjedhja e Presidentit kërkon një marrëveshje politike të gjerë dhe konsensus prej dy të tretave të deputetëve. Sipas Cakollit, koha është vendimtare dhe deri më 5 mars duhet të arrihet marrëveshja dhe të votohet Presidenti, për të shmangur shkeljen e Kushtetutës dhe rrezikun e zgjedhjeve të reja parlamentare. Ai ka theksuar se procesi nuk është një marrëdhënie mes Kryeministrit dhe opozitës, por një proces parlamentar që kërkon bashkëpunim mes forcave politike në Kuvend.