Partia Demokratike e Kosovës dhe Aleanca kanë shprehur kundërshtime të forta ndaj Ligjit të ri për Shtetësinë, duke theksuar se neni 31 i tij mundëson marrjen e shtetësisë nga persona me prejardhje serbe që kanë jetuar në Kosovë deri në vitin 1998 dhe pasardhësit e tyre, gjë që sipas tyre rrezikon sigurinë kombëtare. Deputetja e PDK-së, Ganimete Musliu, ka kërkuar rishikimin urgjent të ligjit dhe ri-amandamentimin e tij, duke propozuar që shtetësitë e marra pas hyrjes në fuqi të ligjit të ri të riprocedohen në rast të ndryshimeve. Nga ana tjetër, Lëvizja Vetëvendosje dhe zëvendësministri i Parë i Ministrisë së Punëve të Brendshme, Enver Dugolli, kanë argumentuar se shqetësimet e opozitës janë artificiale, pasi dispozita e kundërshtuar ka qenë pjesë e ligjit të mëparshëm dhe është shndërruar në normë kushtetuese. Deputetja e Aleancës, Time Kadrijaj, ka kritikuar mënyrën e miratimit të ligjit në procedurë të përshpejtuar dhe ka kërkuar që ligji të ndryshohet pas konstituimit të Kuvendit, duke theksuar se nuk duhet lejuar që persona me të kaluar kriminale të marrin shtetësinë e Kosovës. Ndërkohë, ndryshimi i dispozitës së diskutuar kërkon amendimin e Kushtetutës, për të cilin është e nevojshme pjesëmarrja dhe dakordësia e Listës Serbe.