Kuvendi i Shqipërisë rikthehet në aktivitet këtë të martë pas pushimit veror, me deputetët që do të mblidhen në orën 17:00 për të çelur sesionin e ri parlamentar. Edhe pse Kushtetuta parashikon nisjen e sesionit të vjeshtës të hënën e parë të shtatorit, këtë vit fillimi u shty me një ditë për shkak të pushimit zyrtar. Në këtë ditë pritet të zhvillohet edhe një protestë jashtë godinës së Parlamentit, nga qytetarë që prej më shumë se 100 ditësh vijojnë tubimet në shesh dhe kanë paralajmëruar rikthimin e tyre. Për shkak të kësaj situate, Policia e Shtetit ka marrë masa të shtuara sigurie, duke vendosur kordone në të gjitha hyrjet drejt Parlamentit dhe duke zgjeruar perimetrin e sigurisë përgjatë “Rrugës së Elbasanit”, ndërsa situata do të monitorohet nga afër gjatë seancës plenare.