Presidenca e Republikës së Kosovës ka hapur profile të reja zyrtare në rrjetet sociale, pas përfundimit të mandatit të ish-presidentes Vjosa Osmani, të cilat janë marrë në administrim nga zyra e saj dhe nuk përfaqësojnë më komunikimin zyrtar të institucionit. Ky hap synon të sigurojë vazhdimësinë, qartësinë dhe qëndrueshmërinë e komunikimit me qytetarët, duke e lidhur atë drejtpërdrejt me institucionin e Presidencës dhe jo me mandate individuale. Profilet e reja do të jenë burimi i vetëm i informacionit zyrtar dhe do të administrohen nga Presidenca, duke garantuar që ato të mbeten pronë e institucionit pavarësisht nga kush ushtron funksionin e Presidentit. Kjo nismë vjen në një periudhë kur po vazhdojnë bisedimet për zgjedhjen e presidentit të ri, ndërsa Albulena Haxhiu ushtron detyrën e përkohshme të shefes së shtetit.