Presidentja Vjosa Osmani ka proceduar në Kuvend një paketë amendamentesh kushtetuese që parashikojnë zgjedhjen e presidentit të Kosovës në mënyrë të drejtpërdrejtë nga qytetarët me të drejtë vote. Këto amendamente, të hartuara nga Komisioni për amendamentimin e Kushtetutës në vitin 2011, përcaktojnë se zgjedhjet presidenciale do të shpallen nga kryetari i Kuvendit jo më vonë se gjashtë muaj para përfundimit të mandatit të presidentit në detyrë. Kandidatët për president mund të propozohen nga partitë politike që kanë kaluar pragun zgjedhor, nga subjektet me ulëse të garantuara në Kuvend, ose përmes peticionit me të paktën 15 mijë nënshkrime qytetarësh. Në rast se asnjë kandidat nuk fiton mbi 50% të votave në rrethin e parë, parashikohet mbajtja e një rrethi të dytë zgjedhjesh brenda 30 ditëve mes dy kandidatëve më të votuar, ku fituesi do të bëhet president i Republikës së Kosovës.