Amendamentet kushtetuese të propozuara nga presidentja Vjosa Osmani dhe miratuara në Komisionin Parlamentar për Legjislacion ndryshojnë mënyrën e zgjedhjes së presidentit të Kosovës. Sipas këtyre ndryshimeve, presidenti do të zgjidhet drejtpërdrejt nga qytetarët përmes votimit, me zgjedhjet presidenciale të shpallura nga kryetari i Kuvendit jo më vonë se 6 muaj para përfundimit të mandatit aktual. Në rast se asnjëri kandidat nuk merr shumicën absolute në rundin e parë, mbahet një raund i dytë midis dy kandidatëve më të votuar, ku fituesi shpallet president. Amendamentet parashikojnë gjithashtu vazhdimin e mandatit të presidentit aktual deri në betimin e presidentit të ri dhe mundësinë që ish-presidentët të garojnë në zgjedhjet e ardhshme presidenciale. Presidenti i zgjedhur nga populli nuk mund të shkarkohet nga Kuvendi, por ky i fundit mund të kërkojë shkarkimin e tij përmes Gjykatës Kushtetuese.