Kryeministri në detyrë i Kosovës, Albin Kurti, pas takimit me kryetarin e LDK-së, Lumir Abdixhiku, theksoi se preferenca e parë e Lëvizjes Vetëvendosje mbetet zgjedhja e një presidenti konsensual që gëzon mbështetje të gjerë. Ai rikujtoi se në zgjedhjet e kaluara ishte dakordësuar që numri dy në listën e LVV-së, Vjosa Osmani, të bëhej presidente, duke theksuar se asnjëherë presidenti nuk ka qenë nga opozita. Në mungesë të një marrëveshjeje për një president konsensual, Kurti deklaroi se posti i presidentit i takon Lëvizjes Vetëvendosje, pasi kjo parti ka 53 deputetë, ndërsa koalicioni i kundërt ka 47. Ai gjithashtu bëri thirrje që të zgjidhet një figurë akademike dhe profesionale, jo një president partiak, duke përmendur se ka shumë kandidatë të tillë me vlera dhe kontribute të njohura në shoqëri.