Analisti Sadri Ramabaja ka komentuar vizitat e Presidentes Vjosa Osmani nëpër Kosovë, duke theksuar se ajo ka përzgjedhur një strategji të qartë komunikimi për garën politike që po afron. Sipas Ramabajës, Osmani ka këshilltarë të mirë të mediave që po e ndihmojnë në pozicionimin e saj gjatë fushatës, qoftë ajo pas 45 ditëve, 60 ditëve apo edhe pas katër vjetësh. Ai vlerëson se presidentja ka një kondicion të fuqishëm politik dhe është futur në një garë më specifike. Megjithatë, Ramabaja shton se do të ishte më mirë që ajo të priste deri më 4 prill, por kjo është një vendim që e përcakton vetë Osmani.