Presidentja e Kosovës, Vjosa Osmani, ka përkujtuar 28-vjetorin e Epopesë së Dukagjinit, duke e cilësuar atë si një nga kapitujt më të lavdishëm të luftës për liri. Ajo ka theksuar se kjo betejë përfaqëson kujtesë dhe testament të sakrificës, guximit dhe vendosmërisë për liri, duke u bërë frymëzim i përhershëm për brezat e rinj. Më 24 mars 1998, Ushtria Çlirimtare e Kosovës zhvilloi një betejë frontale në Gllogjan, duke u përballur me forcat e regjimit serb, të cilat kishin rrethuar fshatin dhe familjen Haradinaj, simbol i qëndresës. Në këtë betejë ranë dëshmorët Himë Haradinaj, Gazmend dhe Agron Mehmetaj, të cilët mbeten pjesë e përjetshme e historisë kombëtare dhe të sakrificës për liri.