Presidentja Vjosa Osmani ende nuk e ka kompletuar përbërjen e Komisionit Qendror të Zgjedhjeve (KQZ), duke mos emëruar anëtarin e tretë, pavarësisht aktvendimit të Gjykatës Kushtetuese dhe afatit ligjor që po afron. Dilema e saj lidhet me përkatësinë e këtij anëtari, nëse i takon Lëvizjes Vetëvendosje apo Partisë Demokratike të Kosovës, çështje për të cilën Kushtetuesja ka refuzuar të japë vlerësim, duke theksuar se kompetenca për emërim është ligjore dhe jo kushtetuese. Kryetari i PDK-së, Bedri Hamza, dhe shefja e Grupit Parlamentar të LVV-së, Arbërie Nagavci, kanë kërkuar nga presidentja që të respektojë përfaqësimin proporcional në KQZ sipas rezultatit të zgjedhjeve dhe praktikës institucionale. Në rast se Osmani nuk vepron deri më 4 prill, detyrën e emërimit do ta marrë kryetarja e Kuvendit, Albulena Haxhiu, pasi afati ligjor për emërimin e anëtarëve të KQZ-së është 11 prilli.