Ministrja serbe për Administratë Publike, Snezhana Paunoviq, ka shkaktuar reagime të ashpra ndërkombëtare pas deklaratës së saj se do të kishte spastruar etnikisht Kosovën në vitin 1998 sikur të ishte në vend të Millosheviqit. Zyrtarë të lartë nga Gjermania dhe Bashkimi Evropian kanë dënuar ashpër fjalët e saj, duke kërkuar largimin e ministres nga detyra dhe duke e cilësuar deklaratën si të papranueshme dhe në kundërshtim me të drejtat e njeriut. Eurodeputeti Michael Gahler, deputetja Jasmina Hostert dhe deputeti Adis Ahmetoviq kanë theksuar se një qeveri demokratike nuk duhet të tolerojë një gjuhë urrejtjeje dhe kanë kërkuar shkarkimin e Paunoviqit. Komisionerja për Zgjerim e BE-së, Marta Kos, gjithashtu ka shprehur habinë e saj për vazhdimin e ministres në detyrë, ndërsa autoritetet e Kosovës e kanë shpallur atë person non grata.