Me afatet ligjore që po afrojnë për formimin e institucioneve të reja, skena politike në Kosovë po përballet me presion të madh kohe dhe rrezikun e bllokimit institucional. Takimet zyrtare mes partive nuk janë konfirmuar ende, por negociatat prapaskenë po vazhdojnë, me sinjale për lëvizje drejt kompromisit. Analistët politikë theksojnë se nuk ka më arsye apo kohë për mosmarrëveshje, pasi vendi po rrezikon falimentimin dhe ka nevojë për një marrëveshje konsensuale. Kryeministri në detyrë Albin Kurti ka zhvilluar takime me udhëheqësit e PDK-së dhe LDK-së, ku është shfaqur gatishmëria për vazhdimin e bisedimeve, ndërsa opozita mbetet në qëndrim kritik.