Instituti Demokratik i Kosovës (KDI), Instituti i Kosovës për Drejtësi (IKD) dhe Lëvizja FOL kanë mirëpritur vendimin e Këshillit Prokurorial të Kosovës për propozimin e kandidatit për Kryeprokuror të Shtetit, duke përmbyllur një proces të rëndësishëm për drejtësinë. Sipas tyre, procesi i përzgjedhjes është zhvilluar me transparencë, trajtim të barabartë dhe respektim të parimeve të meritës, duke garantuar mundësi të barabartë për të gjithë kandidatët. Këto organizata bëjnë thirrje që Presidentja e Republikës së Kosovës të dekretojë pa vonesa Kryeprokurorin e ri, duke i dhënë fund periudhës mbi 4 vjeçare të funksionimit me ushtrues detyre. Emërimi i Kryeprokurorit të Shtetit konsiderohet kyç për funksionimin e qëndrueshëm të sistemit prokurorial, forcimin e sundimit të ligjit dhe rritjen e besimit të qytetarëve në drejtësi.