Komuna e Prishtinës i ka kërkuar Agjencisë Kadastrale të Kosovës të ndërmarrë masa urgjente për përshpejtimin e trajtimit të lëndëve pronësore gjatë sezonit veror, për të ulur vonesat dhe përmirësuar shërbimet për qytetarët. Një problem kryesor është rikthimi i lëndëve për plotësim te noterët, të cilat më pas futen sërish në radhën e pritjes sipas datës fillestare, duke shkaktuar bllokime dhe ngadalësim të procedurave të tjera. Për këtë arsye, është kërkuar që në periudhën 1 qershor – 1 shtator të lirohet përkohësisht radhitja automatike e lëndëve, në mënyrë që rastet të trajtohen më shpejt dhe të zvogëlohen afatet e pritjes, veçanërisht për bashkatdhetarët që qëndrojnë për periudha të shkurtra në Kosovë. Gjithashtu, Komuna ka kërkuar përmirësime teknike në sistem për të njoftuar menjëherë zyrtarët pas plotësimit të komenteve nga noterët dhe për të shmangur trajtimin e njëjtës lëndë nga më shumë se një zyrtar në të njëjtën kohë, duke synuar ofrimin e shërbimeve më efikase dhe reduktimin e vonesave.