Komuna e Prishtinës ka kërkuar nga Agjencia Kadastrale e Kosovës masa urgjente për përshpejtimin e trajtimit të lëndëve pronësore, duke ngritur shqetësime për vonesat dhe fluksin e madh të kërkesave, sidomos gjatë sezonit veror dhe me ardhjen e mërgimtarëve. Drejtori i Kadastrës në Prishtinë, Gent Begolli, ka kërkuar heqjen e renditjes aktuale të lëndëve dhe sinjalizimin e lëndëve që vijnë nga noterët, si dhe shmangien e trajtimit të njëjtës lëndë nga shumë zyrtarë për të përshpejtuar procesin. Nga ana tjetër, Agjencia Kadastrale thekson se renditja e lëndëve bazohet në parimin ligjor të prioritetit sipas datës së aplikimit, dhe ndryshimi manual i kësaj renditjeje do të krijonte hapësirë për abuzime dhe do të dëmtonte të drejtat e qytetarëve të tjerë. Agjencia propozon si zgjidhje rritjen e efikasitetit dhe dinamikës së punës në Drejtorinë e Kadastrës në Prishtinë, duke mobilizuar stafin dhe trajtuar më shpejt lëndët me ndërmjetësim, ndërsa thekson se nuk ka bllokim në sistemin qendror.