Kryetari i Prishtinës, Përparim Rama, ka prezantuar Strategjinë e Rinisë 2026–2034, e cila përfshin një plan veprimi katërvjeçar dhe synon fuqizimin e rolit të të rinjve në kryeqytet. Strategjia bazohet në pesë shtylla kryesore: pjesëmarrjen në vendimmarrje, fuqizimin ekonomik dhe ndërmarrësinë, edukimin joformal dhe inovacionin, krijimin e hapësirave rinore, si dhe mirëqenien dhe shëndetin mendor. Rama ka theksuar se për rreth tetë vite Këshilli Lokal Rinor dhe qendrat rinore kanë qenë jofunksionale, duke paralajmëruar riaktivizimin e tyre dhe krijimin e një platforme digjitale për angazhimin e të rinjve. Ai ka nënvizuar rëndësinë e të rinjve si potenciali më i madh i qytetit dhe nevojën për t’u dhënë hapësirë dhe mbështetje për zhvillimin e Prishtinës.