Kryetari i Prishtinës, Përparim Rama, ka publikuar nënshkrimin e Deklaratës së Përbashkët për Projektin e Varrezave të Kryeqytetit, duke e cilësuar këtë si një hap historik drejt rregullimit institucional dhe të barabartë të shërbimeve të varrimit në kryeqytet. Projekti është rezultat i një procesi disa mujor koordinimi me përfaqësuesit e komuniteteve fetare, përfshirë Këshillin e Bashkësisë Islame, Kishën Protestante Ungjillore dhe Famullinë e Prishtinës. Marrëveshja garanton funksionimin e varrezave si hapësirë publike për të gjithë banorët, respektimin e riteve fetare sipas traditave përkatëse dhe administrim profesional në përputhje me standardet e dinjitetit dhe respektit publik. Kryetari Rama theksoi dialogun e hapur dhe bashkëpunimin ndërmjet komunës dhe komuniteteve fetare, duke reflektuar frymën e bashkëjetesës në Prishtinë dhe duke hapur rrugën për një organizim më transparent dhe gjithëpërfshirës të shërbimeve të varrimit.