Përzgjedhja e presidentit të ri në Kosovë kërkon të paktën dy kandidatura me nga tridhjetë nënshkrime të deputetëve për thirrjen e seancës së Kuvendit. Në dy raundet e para, kandidati duhet të marrë 80 vota për t’u zgjedhur, ndërsa në raundin e tretë mjaftojnë 61 vota, me kusht që të jenë të pranishëm të paktën 80 deputetë. Nëse nuk arrihet zgjedhja, Kuvendi shpërndahet dhe organizohen zgjedhje të parakohshme brenda 45 ditësh. Kushtetuta nuk përcakton nëse mund të ketë më shumë se një seancë për zgjedhjen e presidentit para afatit të fundit më 4 mars, çka lë hapësirë për interpretime nga Kuvendi dhe Gjykata Kushtetuese.