Organizatat monitoruese si Lëvizja FOL, IKD, Asociacioni i Gazetarëve të Kosovës dhe juristja Flutura Kusari kanë reaguar ashpër pas monitorimit të procesit të intervistimit për anëtarët e Bordit të RTK-së, duke e cilësuar atë si të komprometuar dhe jo në përputhje me standardet minimale të vlerësimit. Sipas komunikatës së përbashkët, mungesa e transparencës, barazisë dhe rregullsisë procedurale janë arsyet kryesore që kanë dëmtuar procesin. Organizatat rekomandojnë që kandidatët e përzgjedhur nga Komisioni Ad Hoc të mos kalojnë për votim në seancën plenare, duke theksuar se presioni kohor dhe organizimi i dobët kanë ndikuar negativisht në proces. Gjithashtu, ata kritikuan metodologjinë e paqartë të vlerësimit dhe shmangien nga standardet e vendosura më parë gjatë rekrutimit të anëtarëve të Bordit të RTK-së.