Profili i rremë “Lule Gjeli”, i njohur për sulmet dhe shpifjet ndaj figurave publike dhe politike në Kosovë, ka shkaktuar reagime të forta, veçanërisht për akuzat e rënda ndaj ish-Presidentes Vjosa Osmani. Këshilltarja e saj, Egnesa Vitia, njoftoi se janë bërë denoncime në polici që nga maji dhe janë dorëzuar kallzime penale për shpifje ndaj personave që administrojnë profilin. Ish-Presidentja Osmani ka akuzuar drejtpërdrejt Kryeministrin në detyrë Albin Kurti si urdhërdhënës i sulmeve, duke theksuar se ato nuk do të ishin të mundshme pa dijeninë e tij. Prokuroria Speciale ka nisur hetimet, ndërsa ish-zëvendëskryeministri Haki Abazi ka ofruar dëshmi dhe ka akuzuar profilin për ndikim negativ në marrëdhëniet me SHBA-në, duke kërkuar hetim edhe për personat që urdhërojnë aktivitetin e këtij profili.