Programi kombëtar për trajtimin e kryerësve të dhunës ndaj grave në Kosovë nuk është funksionalizuar si duhet dhe zbatohet vetëm në mënyrë vullnetare, pa detyrimin ligjor për gjykatat që të referojnë dhunuesit në këtë program. Analiza e 50 aktgjykimeve tregon se asnjë kryerës dhune nuk është urdhëruar të ndjekë programin, ndërsa dënimet me kusht nuk shoqërohen me masa rehabilituese, duke lënë të hapur rrezikun e përsëritjes së dhunës. Përfaqësuesit e Rrjetit të Grave të Kosovës theksuan se qëllimi i programit është parandalimi i recidivës dhe ndryshimi i sjelljes së dhunuesve, jo thjesht lehtësimi i dënimeve. Ekspertët e IKD-së kritikuan mungesën e përfshirjes së Ministrisë së Drejtësisë dhe theksuan nevojën për akt nënligjor, ngritje kapacitetesh dhe buxhetim adekuat për të siguruar funksionimin efektiv të programit dhe mbrojtjen e viktimave.