Edhe 17 vjet pas demarkacionit mes Kosovës dhe Maqedonisë së Veriut, shumë qytetarë të Kosovës nuk janë kompensuar për pronat që kanë mbetur në territorin e Maqedonisë. Avokati i Popullit i Kosovës, Naim Qelaj, theksoi në një takim me homologët nga Shqipëria dhe Maqedonia sfidat e vazhdueshme në procedurat administrative, veçanërisht për lejet e qëndrimit dhe dokumentacionin shtesë që kërkohet nga institucionet. Ai vuri në dukje mungesën e veprimeve konkrete nga ana e qeverisë për kompensimin e pronave të mbetura jashtë kufirit. Ndërkohë, Avokati i Popullit i Shqipërisë, Endrit Shabani, ngriti shqetësime për ndotjen e mjedisit në lumenjtë e përbashkët dhe vështirësitë në njohjen e vendimeve gjyqësore ndërmjet vendeve të rajonit, duke theksuar nevojën për bashkëpunim më të ngushtë për të garantuar të drejtat e qytetarëve në zonat kufitare.