Sot në Tiranë po mbahet protesta e 28-të kombëtare kundër qeverisë, ku qytetarë nga e gjithë Shqipëria dhe diaspora janë grumbulluar në sheshin “Skënderbej” që në orën 19:00. Protestuesit do të marshojnë drejt godinës së Kryeministrisë për të kërkuar dorëheqjen e kryeministrit Edi Rama, kërkesë kjo që organizatorët thonë se do të vazhdojë të jetë në fokus deri në realizimin e saj. Në tubim janë të pranishëm edhe emigrantë nga vende të ndryshme, të cilët kanë shprehur shqetësime për çështje të pronave dhe drejtësisë, duke denoncuar mungesën e përgjegjësisë nga institucionet. Media dhe gazetarë të huaj ndjekin ngjarjen, ndërsa disa eurodeputetë kanë paralajmëruar pjesëmarrjen e tyre, duke i dhënë kështu një dimension ndërkombëtar protestës.