Kreu i Partisë Demokratike, Sali Berisha, ka dalë nga selia e partisë për t’u nisur drejt protestës së opozitës që do të zhvillohet para Kryeministrisë në Tiranë. Tubimi, i cili pritet të zgjasë nga ora 19:00 deri në 22:00, do të zhvillohet në formën e një marshimi pa fjalime, sipas organizatorëve. Për garantimin e rendit dhe sigurisë janë angazhuar rreth 1,500 punonjës policie, ndërsa janë vendosur masa të rrepta për qarkullimin dhe parkimin në disa bulevarde dhe rrugë kryesore të kryeqytetit. Në terren ka qenë edhe drejtori i Përgjithshëm i Policisë, Skënder Hita, i cili ka inspektuar masat e sigurisë në bulevardin “Dëshmorët e Kombit”.