Zyra Kombëtare e Auditimit ka publikuar raportin për periudhën 2020–2024, ku evidenton se masat për fuqizimin e grave nuk kanë arritur të sigurojnë përfaqësim të kënaqshëm të tyre në pozita udhëheqëse dhe vendimmarrëse. Edhe pse gratë përbëjnë 42% të të punësuarve në shërbimin civil, vetëm 471 nga 1,459 pozita drejtuese mbahen prej tyre, ndërsa pjesa më e madhe i përket burrave. Raporti thekson se objektivat për barazi gjinore nuk janë shndërruar në masa konkrete dhe të monitorueshme, dhe masat afirmative janë përdorur kryesisht si mundësi ligjore në raste të veçanta, jo si instrument aktiv për adresimin e nënpërfaqësimit. Gjithashtu, mungesa e zhvillimit profesional të orientuar drejt grave dhe problemet në regjistrimin dhe raportimin e të dhënave sipas gjinisë kanë kufizuar analizën dhe planifikimin e masave për rritjen e përfaqësimit të tyre në pozita udhëheqëse.