Analisti politik Nuri Bexheti ka theksuar në emisionin “Click” në RTV21 se situata politike në Kosovë kërkon një konsensus të gjerë dhe jo dominim të një partie të vetme. Ai vlerëson se asnjë forcë politike nuk ka fituar absolutisht dhe se koha politike nuk po punon në favor të kryeministrit në detyrë, Albin Kurti. Sipas Bexhetit, Lëvizja Vetëvendosje dhe partitë e komuniteteve joserbe nuk kanë numrat e nevojshëm për të formuar qeverinë e re, duke e bërë të vështirë sigurimin e shumicës parlamentare. Ai gjithashtu thekson rëndësinë e bashkëpunimit politik dhe institucional me komunitetet pakicë dhe kujton traditën e ndarjes së pushtetit në Kosovë, duke përmendur shembullin e Ibrahim Rugovës si model i balancës institucionale.