Sindikata e Punëtorëve të Radiotelevizionit të Kosovës (SPERTK) i ka dërguar një letër publike kryeministrit Albin Kurti, ministrit të Financave Hekuran Murati dhe Komisionit për Buxhet dhe Transfere, duke kërkuar që punëtorët e RTK-së të përfshihen në mekanizmin ligjor dhe buxhetor për pagesën e 13-të për vitin 2026. Sipas vendimit të miratuar për buxhetin e Kosovës dhe deklaratave zyrtare, punonjësve të sektorit publik do t’u paguhet paga e 13-të, por RTK-ja është përjashtuar, duke krijuar një pabarazi ndaj punonjësve të saj krahasuar me institucionet e tjera të financuara nga buxheti i shtetit. Sindikata thekson se RTK-ja është financuar nga fondet publike dhe kontribuon drejtpërdrejt në shërbimet publike dhe informimin e qytetarëve, prandaj kërkon miratimin e një akti ligjor ose vendimi administrativ që e rregullon përfshirjen e RTK-së në këtë pagesë. Në rast se nuk merret një përgjigje konkrete dhe të dokumentuar, SPERTK paralajmëron përdorimin e të gjitha mjeteve ligjore sindikale për të mbrojtur interesat e punonjësve të RTK-së.