Ministria e Drejtësisë e Kosovës organizoi një punëtori treditore ku u mblodhën përfaqësues të institucioneve kryesore të sistemit të drejtësisë për të diskutuar pakon ligjore që rrjedh nga Deklarata e Përbashkët e Zotimit. Zëvendësministri i Drejtësisë, Genc Nimoni, theksoi rëndësinë e avancimit të reformave për të forcuar mekanizmat e kontrollit të integritetit, vlerësimit të performancës dhe disiplinimit për gjyqtarët dhe prokurorët, si dhe për të avancuar rolin e Akademisë së Drejtësisë dhe programeve trajnuese. Në punëtori morën pjesë përfaqësues nga Këshilli Gjyqësor, Këshilli Prokurorial, Agjencia për Parandalimin e Korrupsionit, Policia e Kosovës, partnerë ndërkombëtarë dhe organizata të shoqërisë civile. Nimoni nënvizoi se miratimi dhe zbatimi i projektligjeve është një detyrim i rëndësishëm në kuadër të Planit të Rritjes, i cili përfshin edhe mbështetje financiare nga Bashkimi Evropian, dhe bëri thirrje për harmonizim të qëndrimeve për të arritur objektiva konkrete në forcimin e sistemit të drejtësisë.