Deputeti Arben Mustafa nga PDK-ja ka kritikuar ashpër qeverisjen e Lëvizjes Vetëvendosje, duke theksuar se mungesa e rezultateve ka bërë që pushteti të përqendrohet vetëm në shpërndarjen e mjeteve financiare, duke humbur fokusin nga përgjegjësia dhe llogaridhënia ndaj qytetarëve. Ai theksoi se kjo praktikë nuk duhet të mbetet vetëm çështje politike, pasi sipas tij, qeveria nuk respekton vendimet e Gjykatës Kushtetuese dhe përdor buxhetin e shtetit si mjet politik pa vlerësim të qartë të efekteve. PDK-ja mbështet çdo iniciativë që synon kufizimin e diskrecionit të Qeverisë dhe parandalimin e përdorimit të parasë publike për interesa partiake. Në këtë kontekst, Instituti i Kosovës për Drejtësi ka nisur një nismë legjislative qytetare për ndryshimin e Kodit Penal, duke propozuar sanksione penale për përdorimin e fondeve publike në përfitime elektorale gjatë periudhave zgjedhore.