Mbledhja e Qeverisë së Kosovës ka nisur me një minutë heshtje në nderim të tre kosovarëve që humbën jetën tragjikisht në Vjenë të Austrisë, pas shembjes së një kantieri ndërtimi. Viktimat janë Pajtim Bajrami, Istref Zekaj dhe Asllan Musliu, të cilët vdiqën në vendin e punës gjatë një aksidenti. Kryeministri Albin Kurti u shpreh ngushëllime familjeve të viktimave dhe theksoi rëndësinë e kujdesit për punëtorët jashtë vendit. Në mbledhjen e sotme të Qeverisë po ashtu po shqyrtohen propozim-vendime të ndryshme, përfshirë bartjen e Zyrës për çështjet e kategorive të dala nga lufta e UÇK-së në Ministrinë për Punë, Familje dhe Vlerat e Luftës Çlirimtare.