Qeveria e Kosovës ka reaguar pas vendimit të Gjykatës Kushtetuese që vendosi masën e përkohshme për pezullimin e dekretit të shpërndarjes së Kuvendit deri në shqyrtimin e plotë të çështjes. Në komunikatën për media, Qeveria thekson se ky vendim krijon hapësirë për trajtim të plotë në përputhje me rendin kushtetues dhe parimet demokratike të institucioneve. Për tri javë vendi do të jetë në një periudhë pritjeje, duke penguar miratimin e disa marrëveshjeve dhe vendimeve të rëndësishme për qytetarët. Qeveria shpreh pritjen që vendimi përfundimtar i Kushtetueses të japë qartësi të plotë dhe të përcaktojë standardet kushtetuese për të shmangur pengesa të ngjashme në të ardhmen.