Qeveria në detyrë e Kosovës ka miratuar vendimin për shpronësimin e pronave të paluajtshme ish-shoqërore në disa zona kadastrale të vendit, në interes të zhvillimit të infrastrukturës së navigacionit ajror. Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, njoftoi se ky projekt përfshin zona në komunat e Lipjanit, Rahovecit, Prishtinës dhe Mitrovicës së Jugut. Qëllimi kryesor i këtij vendimi është përmirësimi i sigurisë ajrore, modernizimi i shërbimeve dhe avancimi i kapaciteteve strategjike të Republikës së Kosovës. Ky hap pritet të krijojë kushtet e nevojshme për funksionalizimin dhe zhvillimin e mëtejshëm të shërbimeve të navigacionit ajror në vend.