Pas përleshjeve verbale dhe fizike në Kuvendin e Kosovës, kryeministri Kurti organizoi një mbledhje online të Qeverisë në detyrë, ku u miratuan vendime të shumta. Në këtë mbledhje u aprovua qiradhënia për shfrytëzimin e gurit gëlqeror në Ferizaj dhe u emëruan komisione pranimi për pozicione të larta drejtuese në shumë agjenci dhe inspektorate të ndryshme. Po ashtu, u miratuan kërkesa për shpronësim të pronave për projekte të rëndësishme publike në Shtime dhe Prishtinë. Në mbështetje të kulturës dhe promovimit ndërkombëtar, Qeveria ndau 100,000 euro për Festivalin Ndërkombëtar të Filmit Dokumentar dhe të Shkurtër “DokuFest”, duke theksuar rëndësinë e tij për imazhin dhe diplomacinë kulturore të Kosovës.