Eugen Cakolli nga Instituti Demokratik i Kosovës ka theksuar se qeveria aktuale në dorëheqje nuk ka mandat ligjor për të nisur politika të reja publike, për të krijuar grupe të reja punuese apo për të filluar procese legjislative që ndikojnë përtej mandatit të saj. Sipas Ligjit për Qeverinë, veprimet e një qeverie në largim janë të kufizuara për të parandaluar përcaktimin e prioriteteve nga ekzekutivi në largim për qeveritë e ardhshme. Këto kufizime përfshijnë të gjithë ciklin vendimmarrës dhe nuk lejojnë miratimin e akteve të reja që nuk burojnë nga nevoja emergjente shtetërore apo nga dokumentet e planifikuara vjetore. Situata bëhet më problematike kur qeveria tenton të ndërmarrë iniciativa të paplanifikuara, duke cenuar kështu qëllimin e ligjvënësit për kufizimin e veprimeve të saj në periudhën e dorëheqjes.