Qeveria ka marrë një vendim të rëndësishëm për profesionistët shëndetësorë, duke vendosur që specializanteve lehona t’u paguhet edhe gjatë muajve shtesë pas pushimit të lehonisë. Ky është një hap i parë dhe historik, i cili synon të sigurojë që periudha e lehonisë të mos pengojë përfundimin e specializimit. Ministri i Shëndetësisë, Arben Vitia, ka theksuar se ky vendim është i paraparë në Udhëzimin Administrativ për shkollim specialistik dhe do të zbatohet në vazhdimësi. Ai gjithashtu ka shprehur mirënjohje për të gjithë profesionistët shëndetësorë me rastin e Ditës Ndërkombëtare të Punëtorëve, duke vlerësuar kontributin e tyre në shërbim të qytetarëve.