Komuna e Rahovecit, nën drejtimin e kryetarit Smajl Latifi, është bërë e para në vend që ofron sigurim shëndetësor për nxënësit parafillor në institucionet parashkollore. Ky projekt, pjesë e programit qeverisës katërvjeçar, synon të mbulojë shpenzimet eventuale shëndetësore të rreth 350 fëmijëve në çerdhe, pa asnjë kosto për prindërit. Kontrata njëvjeçare me vlerë 69,600 euro është fituar nga kompania “SIGAL Insurance Group SH.A.”, ndërsa komuna merr përsipër të gjitha shpenzimet që mund të lindin gjatë qëndrimit të fëmijëve në institucionet parashkollore. Kryetari Latifi thekson se, megjithëse sigurimi shëndetësor është përgjegjësi e nivelit qendror, iniciativa e Rahovecit synon të lehtësojë barrën financiare për familjet dhe të rrisë sigurinë e fëmijëve gjatë periudhës së kontratës.