Kryeministri Edi Rama zhvilloi në Talin të Estonisë një takim me homologun estonez Kristen Michal, ku theksoi admirimin për Estoninë si model në inovacion dhe teknologji. Rama ftoi novatorët estonezë të shohin Shqipërinë si një mundësi për zhvillim, duke theksuar se në vendin tonë ata do të ndihen si në shtëpi dhe do të gjejnë një ambient të përshtatshëm për bashkëpunim, veçanërisht në fushën e arsimit dhe teknologjisë së informacionit. Kryeministri theksoi rëndësinë e bashkëpunimit në rrugën drejt integrimit evropian dhe zhvillimit të inteligjencës artificiale, duke e cilësuar Shqipërinë dhe Estoninë si dy vende që synojnë të kapin të ardhmen larg ndikimeve të së shkuarës. Nga ana e tij, kryeministri estonez shprehu mbështetjen për integrimin e Shqipërisë në BE dhe theksoi rëndësinë e bashkëpunimit në fushën dixhitale dhe inovacionit, duke vlerësuar fluturimet direkte si një mundësi të re për turizëm dhe biznes.