Kryeministri i Shqipërisë, Edi Rama, në një episod të podkastit “Flasim” me profesor Arjan Gjonçaj, diskutoi lidhur me mungesën e mbështetjes financiare nga shteti i Kosovës për komandantët e Ushtrisë Çlirimtare të Kosovës (UÇK) në gjyqin në Hagë. Gjonçaj u shpreh i habitur për mungesën e ekspertizës dhe ndihmës financiare nga Kosova, ndërsa Rama tha se nuk kishte diskutuar drejtpërdrejt me kryeministrin e Kosovës, Albin Kurti, për këtë çështje. Sipas Ramës, Kurti ka pasur frikë të japë mbështetje financiare për të mos rënduar pozicionin e tij në raport me Bashkimin Evropian dhe Shtetet e Bashkuara, duke mos dashur të ekspozohej si kundërshtar i sistemit ndërkombëtar. Rama theksoi se dëshira e tij dhe e Gjonçajt është që udhëheqësit e UÇK-së të kthehen në shtëpi dhe shprehu se Shqipëria ka ndihmuar më shumë me sensibilizim, edhe pse nuk ka pozicion politik në Kosovë.