Kryeministri Edi Rama ka njoftuar se pensionet do të rriten çdo vit në muajin janar, duke filluar nga rritja reale që ka nisur tashmë dhe do të vazhdojë në mënyrë progresive deri në vitin 2030. Ai paralajmëroi ndryshime në skemën e pensioneve për kategori të ndryshme përfituesish, duke përfshirë pensionistët e vetëpunësuar dhe ata që vazhdojnë të punojnë, si dhe mbështetje të barabartë për invalidët. Në rast të rritjes së çmimeve, veçanërisht për shkak të faktorëve ndërkombëtarë si lufta dhe pandemia, pensionistët dhe familjet në nevojë do të mbrohen përmes një “karte të shpenzimeve familjare” që synon të lehtësojë koston e produkteve bazë. Rama theksoi se zhvillimi ekonomik i Shqipërisë, i cili ka kaluar nga më pak se 10 miliardë euro në mbi 27 miliardë euro, është baza kryesore që mundëson përmirësimin e kushteve të jetesës dhe rritjen e pensioneve.