Kryeministri Edi Rama, gjatë 35-vjetorit të Partisë Socialiste në Lezhë, theksoi se PS-ja ka ngritur kokën e çdo shqiptari dhe ka transformuar Shqipërinë nga "delja e zezë" në një vend që po afrohet me ëndrrën historike të integrimit europian. Ai pranoi gabimet e qeverisjes, por vuri në dukje se pamja e përgjithshme është pozitive dhe se PS-ja ka një raport të fortë me interesin kombëtar dhe historinë. Rama u distancua nga fjalori i ashpër i opozitës dhe deklaroi se nuk do t’u përgjigjet me të njëjtën mënyrë, duke mos përdorur kurrë sulme ndaj familjeve të kundërshtarëve politikë, pavarësisht baltës që sipas tij është hedhur ndaj familjes së tij. Ai përmendi se njerëzillëku dhe kultura europiane janë ato që e dallojnë PS-në nga forcat e tjera politike në Shqipëri.