Në 27-vjetorin e themelimit të Policisë së Kosovës, Burim Ramadani ka kërkuar një program të veçantë nacional për zhvillimin dhe modernizimin e institucionit. Ai thekson nevojën për dyfishim të pagave dhe rritje të buxhetit, si dhe përmirësim të pajisjeve dhe kapaciteteve hetimore, duke përfshirë avancimin e njësive të specializuara, sidomos në fushën e sigurisë kibernetike. Ramadani ka kërkuar gjithashtu fuqizimin e njësive intervenuese dhe kontrolluese, sigurimin shëndetësor dhe pako sociale për pjesëtarët e Policisë, si dhe rinovimin e stafit përmes një sistemi të pensionimit të beneficuar. Ai ka uruar policët për këtë përvjetor dhe ka përkujtuar me respekt ata që ranë në krye të detyrës, duke rikujtuar edhe moton promovuese të Policisë së Kosovës.