Deputeti Shaip Kamberi ka komentuar raportin e fundit të Komitetit për Eliminimin e Diskriminimit Racor të OKB-së, i cili evidenton shqetësime serioze për pozitën e shqiptarëve në Luginë të Preshevës. Raporti thekson përdorimin e gjuhës së urrejtjes ndaj pakicës shqiptare, përfaqësimin e pamjaftueshëm në institucionet lokale dhe aplikimin diskriminues të ligjit për vendbanimin, që ka çuar në pasivizimin e adresave dhe humbjen e të drejtave civile dhe politike. Kamberi nënvizon se këto gjetje janë reflektim i realitetit të përditshëm të shqiptarëve dhe kërkojnë përgjigje të menjëhershme institucionale në përputhje me standardet ndërkombëtare. Ai thekson se respektimi i të drejtave të pakicave është një detyrim ndërkombëtar dhe themel i demokracisë, jo një zgjedhje politike.