Analisti Shenoll Muharremi ka reaguar ndaj deklaratave të Nasim Haradinajt, i cili paralajmëroi trazira në Kosovë në rast të një vendimi dënues nga Gjykata Speciale ndaj ish-krerëve të Ushtrisë Çlirimtare të Kosovës. Muharremi ka bërë thirrje për maturi, duke theksuar se dëmtimi apo destabilizimi i vendit nuk do të ndikonte në vendimet e kësaj gjykate, e cila funksionon jashtë territorit të Kosovës dhe nuk ndikohet nga veprimet brenda vendit. Ai ka pyetur se çfarë përfitimi do të kishte shkatërrimi i Kosovës dhe ka shprehur shpresën që ekipet mbrojtëse të kenë argumentuar pafajësinë e të akuzuarve, në mënyrë që ata të kthehen pranë familjeve të tyre.